– Pressa i Israel gjer ikkje jobben sin i Gaza-krigen, og har teke rolla som heiagjeng for hæren.
Det meinte den israelske fotojournalisten Anat Saragusti då ho blei intervjua av NRK- Dagsrevyen i februar.
Saragusti er ei av få opne kritikarar av måten israelske medium dekkjer Gaza-krigen på. I 25 år jobba ho som journalist i Gaza og var mellom anna korrespondent for ein av dei leiande tv- kanalane i Israel. Ho meiner innsatsen til soldatane pregar det israelske nyheitsbiletet, utan at lidingane til palestinarane i Gaza kjem fram.
Saragusti er rekna som første kvinnelege krigsfotograf i Israel, ho har vore produsent, nyheitsredaktør og skriv no mellom anna kronikkar i avisa Haaretz. Saragusti er utdanna jurist og oppteken av pressefridom og menneskerettar. Ho kjem til Hauststormen direkte frå ein paneldebatt i FN-regi i Geneve.
I samtale med den erfarne Midtausten-journalisten Sidsel Wold, utdjupar ho synet på pressedekninga av Gaza-krigen og den siste utviklinga i regionen elles.